Ish-kryeministri Sali Berisha mbron nismën për organizimin e një proteste të madhe në datën 6 dhjetor, ditën kur në Tiranë do të mbahet samiti i Bashkimit Europian me vendet e Ballkanit Perëndimor.
Berisha tha se protesta duhet parë si një përshëndetje për liderët e BE-së, të cilët sipas tij, i dhanë një goditje të rëndë nismës “ruso-serbe” të Ballkanit të Hapur.
Berisha tha se të gjithë ata që e ndjejnë veten shqiptar, duhet të jenë pjesë e protestës në 6 dhjetor.
“Është një nder i papërsëritshëm për Shqipërinë, është një përzgjedhje gjeostrategjike e një rëndësie me të cilin Europa i thotë Putinit dhe të tjerëve që Shqipëria është territor i yni dhe harrojeni se mund të keni ambicie të tjera. Në këtë mënyrë ky samit është në interes madhor të shqiptarëve, dhe i jep një goditje shumë të rëndë projektit të Aleksandër Vuçiç, Edi Ramës dhe vasalit të tij në Shkup, projektit të “Open Balkan” i mbështetur hapur nga Lavrov dhe jo më pak nga George Soros, i kësaj nisme ruso-serbe.
Liderët europianë ta marrin protestën si një përshëndetje ndaj tyre dhe vlerave të tyre. Nga ana tjetër ne jemi në rrugë dhe shesh për të protestuar kundër armikut të vlerave europiane në Shqipëri, Edi Ramës. Nuk fshehim asgjë, përkundrazi, ne dalim në datën 6 për t’i thënë liderave të Europës se ky është një armik i vlerave themelore, i votës së lirë të shqiptarëve, të drejtave të tyre, i fondeve dhe pasurive publike të tyre, armik i së ardhmes së tyre. Në tërë historinë të ardhmen e shqiptarëve askush nuk e ka vjedhur më shumë se Enver Hoxha dhe Edi Rama. Në 6 dhjetro ai që i thotë vetes shqiptar nuk mund të jetë kund tjetër veç se në protestë”, deklaroi Berisha gjatë një takimi me demokratë të Njësisë 5 në Tiranë.
