Sali Berisha, lideri i Partisë Demokratike, ka përshëndetur Ilir Metën dhe Ervin Salianjin, të cilët po kalojnë natën në qelitë e paraburgimit. Gjatë një tubimi në ‘Rrugën e Shpresës’, ai i quajti ata si qëndrestarë të kauzës shqiptare dhe kritikoi qeverinë e Edi Ramës për dënimet politike që iu janë dhënë.
Berisha theksoi se arrestimet janë një shenjë e një regjimi mafioz dhe se skenat e dhunshme që ndodhin në Shqipëri tejkalojnë ato të çdo diktature tjetër.
Berisha: Mirëmbrëma dhe përshëndetjet më të përzemërta, mirënjohjen më të pakufishme ndaj jush, qëndrestarëve dhe qendrestareve të vërtetë, të kauzës së drejtë të çdo shqiptari.
Një përshëndetje të përzemërtë sot, të gjithë opozitareve dhe opozitarëve të cilët panë skena të urdhëruara nga Edi Rama, që tejkalojnë skenat e çdo diktature tjetër në Europë dhe botë.
Përshëndes të burgosurit politik, ish-presidentin, ish-kryeministrin, ish-kryetarin e parlamentit, kryetarin e Partisë së Lirisë, Ilir Meta dhe deputetin e PD-së, Ervin Salianji që kalojnë natën si qëndrestarë në qelitë e regjimit mafioz të Edi Ramës.
