Ish-kryeministri Sali Berisha ka mbledhur sot kryesinë e Partisë Demokratike që drejtohet prej tij.
Në një konferencë për media nga selia blu, Berisha tha se aksioni opozitar nuk do të përdorë dhunë për rrëzimin e qeverisë. “Partia Demokratike nuk është parti e dhunës”, u shpreh ai.
Berisha gjithashtu tha se ka mbledhur kryesinë për të ndarë detyrat konkrete për “betejë në të gjitha planet”.
Pjesë nga deklarata e Berishës:
Nuk shkojmë te forca, nuk e marrim pushtetin me forcë. Por përdorim çdo formë të mosbindjes civile. Ky parlament s’ka qenë në këtë situatë. Një grusht njerëz të zhveshur nga çdo lloj morali, e trajtojnë parlamentin si një klub të neveritshëm.
Demokratët nuk kanë ndërmend të tërhiqen nga zgjedhjet, as të dorëzohen. Ky është revolucion.
Unë e kuptoj se ky term ngjall debat. Por në rast se një vendi, me forca madhore, i shkatërrohet pluralizmi, si mund ta rivendosë ai?
Ai është një akt kundërrevolucionar, ky është revolucion. Ai është grusht shteti kundër pluralizmit.
Ne jemi në të drejtën tonë dhe ne i injorojmë këto. Marrim vetëm qëndrimet e parlamentit: a mund të veprohet në një parlament siç vepron Edi Rama me Lindën e tij kryetare?
Në mënyrën më të turpshme dhe të padenjë. Ndaj dhe ne rezistencën në parlament duhet ta shumëfishojmë. Nuk e dorëzojmë ne parlamentin. Nuk kemi autoritet për të dorëzuar parlamentin. Ne përfaqësojmë 750 mijë zgjedhës.
Kështu që thashë të bëjmë këtë mbledhje, të përcaktojmë detyra më konkrete dhe të vazhdojmë betejën në të gjitha planet
