Pas disa orësh pyetje, biznesmeni Behgjet Pacolli ka dalë nga Prokuroria e Tiranës, ku u mor në pyetje si deklarues mbi 47% të aksioneve të aeroportit të Vlorës dhe mbi konfliktin me aksionerin Valdon Ademi. Pacolli shprehu besimin tek drejtësia dhe konfirmoi se aeroporti do të realizohet si një projekt i suksesshëm.
Gazetarja Anila Hoxha e Top Channel raportoi se Pacolli u thirr nga prokurori Ndini Tavani dhe oficeri Andri Dervishi për t’u pyetur rreth rrethanave të ngjarjes dhe mosmarrëveshjes mes tij dhe Ademit. Ky i fundit, aksioner i minorancës në koncesion, akuzon Pacollin për mashtrim, duke pretenduar se ka të drejtë për 47% të aksioneve, kur në të vërtetë zotëron vetëm 2%.
Konflikti ka origjinën në një kontratë noteriale të nënshkruar pas largimit të grupit turk YDA nga koncesioni. YDA kishte 40% të aksioneve të aeroportit, të cilat i shiti kompanisë Mabco të Pacollit për 4200 euro. Pas kësaj, Mabco dhe 2A Group kanë rënë dakord për ndarjen e aksioneve, por këto marrëveshje ende nuk janë regjistruar në Qendrën Kombëtare të Biznesit.
2A Group, e drejtuar nga Ademi, kërkon njohjen e pronës të 47% të aksioneve duke u mbështetur në kontratën noteriale, por Mabco kundërshton këtë pretendim dhe nuk pranon ndryshimin e strukturës së aksioneve. Kjo përplasje ka çuar në shkarkimin e administratorit të parë dhe dorëheqjen e administratorit të dytë.
Në vazhdën e akuzave, Valon Ademi ka bërë kallëzim ndaj Pacollit, duke rezultuar në një masë sigurie nga gjykata, e cila pezullon çdo vendim të planifikuar në Asamblenë e Përgjithshme të Ortakëve që do të mbahej më 20 tetor 2025. Krahas kësaj, është pezulluar e drejta e votës për Mabco, deri në regjistrimin e kontratës për 49% të kuotave të shoqërisë “VIA”.
Prokuroria e Tiranës ka filluar hetimin për tre individë, përfshirë Pacollin dhe të vëllanë e tij, Emin. Në hetim është përfshirë gjithashtu Nelson Çela, administrator i Mabco. Të tre janë të akuzuar për mashtrim të rëndë, mashtrim kompjuterik dhe falsifikim dokumentesh.
