Donald Trump shfaq irritim ndaj aleatëve europianë, të cilët po e refuzojnë kërkesën e tij për ndihmë në lidhje me situatën në Gjirin e Hormuzit. Kancelari gjerman Friedrich Merz ka theksuar se lufta me Iranin “nuk është çështje e NATO-s”, derisa zyrtarë francezë konfirmuan se Parisi nuk do të dërgojë forca detare për këtë çështje, duke ndjekur një politikë të kujdesshme. Presidenti i Finlandës, Alexander Stubb, gjithashtu shprehu mospraninë për të mbështetur një përshkallëzim të situatës ushtarakisht.
Trump shprehu habi se vendet e tjera nuk ishin “të etura” për të ndihmuar dhe theksoi se Kina dhe Japonia, të cilat varen nga furnizimi me naftë nga kjo ngushticë, duhet të kontribuojnë. Kërkesa e tij për ndihmë nga aleatët europianë për sigurimin e kalimeve të naftës dhe gazit në Gjirin e Hormuzit ishte një nga temat kryesore në takimin e ministrave të jashtëm të Bashkimit Europian (BE) në Bruksel.
Charles Hecker, bashkëpunëtor i Institutit Mbretëror për Shërbime të Bashkuara (RUSI), theksoi se europianët janë të kujdesshëm për të dërguar trupa, pasi kjo do t’i bënte ata objektiva të mundshëm për Iranin. Gjatë takimit, diplomatja e lartë e BE, Kaja Kallas, nënvizoi rëndësinë e mbajtjes së Ngushticës së Hormuzit të hapur dhe se blloku po shqyrtonte veprime të mundshme për sigurimin e saj, ndërkohë që ishte në kontakt me autoritetet amerikane.
Megjithatë, pas diskutimeve, ajo konfirmoi se nuk kishte “asnjë dëshirë” nga ana e vendeve anëtare për të zgjeruar misionin detar të BE në këtë ngushticë për momentin. Situata mbetet komplekse në një kohë kur tensionet midis SHBA dhe Iranit vazhdojnë të rriten, dhe përgjigja e Europës ndaj kërkesave të Trump mbetet e paqartë.
