TIRANË- Kryeministri Edi Rama tha sot se Bashkimi Europian ka një mekanizëm që monitoron ecurinë e punëve në një vend që pretendon të bëhet pjesë e tyre. Rama u shpreh se BE nuk do t’ja dijë për parti të caktuara por shikon vetëm punën dhe rezultatet.
Më tej ai tha se Shqipëria po bëhet shtet i gatshëm për tu bërë pjesë e Bashkimit Europian. Sipas tij për këtë duhet votuar PS më 11 maj, që të mos humbet asnjë ditë nga procesi i negociatave.
“BE nuk bën as lojëra dhe as komente në FB, nuk merr pjesë në votim e në Shqipëri nuk ka fanelë partiake por ka një mekanizëm të tërë për të monitoruar ecurinë e punëve në një vend që pretendon të bëhet pjesë e BE. Dhe nuk do të dijë fare as për përkatësira politike, është mekanizëm i ftohtë që shikon vetëm punën dhe rezultatet. Nëse thotë të kundërtën e këtyre që thua ti, do të thotë që në të vërtetë Shqipëria po bën hapa shumë të mëdhenj në transformimin e të gjithë organizmit të vetë shtetëror, dhe po bëhet shtet i gatshëm për t’u bërë shtet anëtar i BE. Ky është fakt që s’e luan as topi. Pse duhet vota me 11 Maj, sepse këto negociata janë një proces ku nuk ka asnjë ditë, jo më muaj apo vit për të humbur. Nëse humbasim edhe një ditë, gjërat shtyhet dhe porta mund të mbyllet.”, tha Rama.
