Bashkimi Evropian do të implementojë një sistem të ri të hyrjes dhe daljes për qytetarët jo të BE-së, duke filluar nga 12 tetori. Ky sistem i avancuar, i njohur si EES – Entry/Exit System, do të regjistrojë të dhënat biometrike të udhëtarëve, si gjurmët e gishtërinjve dhe imazhin e fytyrës. Sipas “The Guardian”, EES do të zëvendësojë vulosjen manuale të pasaportave, regjistrojë datën dhe kohën e hyrjes dhe daljes, si dhe të llogarisë automatikisht kohëzgjatjen e qëndrimit të lejuar, duke sinjalizuar shtetet anëtare për rastet e qëndrimeve të tejzgjatura.
Ky sistem do të prekë edhe qytetarët e Ballkanit Perëndimor: Shqipërinë, Kosovën, Maqedoninë e Veriut, Bosnje-Hercegovinën, Malin e Zi dhe Serbinë, të cilët kanë akses pa viza për hyrje të shkurtër në zonën Shengen. Ai do të lejojë kontrollin automatik të kohëzgjatjes së qëndrimit për turistët dhe udhëtarët e biznesit, duke zëvendësuar procesin tradicional të kontrolleve kufitare. Zbatimi i këtij sistemi do të bëhet progresiv gjatë gjashtë muajve të ardhshëm dhe pritet të hyjë në funksion të plotë në janar 2026.
Makineritë për marrjen e gjurmëve të gishtërinjve janë vendosur tashmë në disa pika kalimi, si terminali Eurostar në Londër dhe Portin e Doverit. Komisioni Evropian beson se ky sistem do të rrisë sigurinë kufitare dhe do të përshpejtojë procesin për udhëtarët e rregullt.
