Zyra Federale e Policisë Kriminale të Gjermanisë (BKA) ka nisur kontrolle në selinë qendrore të Deutsche Bank në Frankfurt dhe në ambientet e saj në Berlin, në një hetim që ka si fokus dyshime për pastrim parash. Sipas raportit të Der Spiegel, hetimi po zhvillohet për disa zyrtarë dhe punonjës të paidentifikuar të bankës.
Operacioni ka filluar rreth orës 10:00 të së mërkurës, me rreth 30 hetues të veshur civilë që kanë hyrë në ndërtesën e Deutsche Bank për të shqyrtuar marrëdhëniet e saj me kompani të huaja të dyshuara për aktivitete të paligjshme financiare. Një zëdhënës i Prokurorisë Publike në Frankfurt ka njoftuar se nuk mund të jepet informacion shtesë në lidhje me natyrën e marrëdhënieve të bankës ose transaksionet që kanë ndodhur.
Deutsche Bank ka konfirmuar kontrollin duke theksuar se po bashkëpunon plotësisht me autoritetet. Një zëdhënës i bankës ka theksuar se operacioni është në vijim dhe se banka është e angazhuar të ndihmojë në zbulimin e fakteve.
Sipas Süddeutsche Zeitung, hetimi lidhet me oligarkun rus Roman Abramovich, i cili ka qenë klient i Deutsche Bank dhe është nën sanksione të Bashkimit Evropian që nga marsi i vitit 2022 për shkak të agresionit rus në Ukrainë. Dyshohet se banka ka dështuar në raportimin e disa transaksioneve të dyshimta në lidhje me kompanitë e Abramovich.
Kjo situatë ndodhet në një periudhë të ndjeshme për Deutsche Bank, pasi vetëm një ditë përpara, drejtori ekzekutiv Christian Sewing pritej të shpallte fitimet më të larta të bankës në shumë vite. Megjithatë, zhvillimet e fundit kanë ngjallur pyetje dhe presion të shtuar mbi drejtuesit e këtij institucioni financiar.
