Policia e Tiranës ka arrestuar ditën e sotme dy persona, pasi u kapën në flagrancë duke vënë baste sportive.
Sipas policisë, në flagrancë është arrestuar personi me inicialet K. S., 35 vjeç, dhe B. F., 54 vjeç, banues në Tiranë, ndërsa është shpallur në kërkim personi me inicialet G. H., pronar i lokalit në Rrugën e Barrikadave.
Njoftimi i Policisë:
DVP Tiranë/ Komisariati i Policisë Nr. 3 në vijim të punës për goditjen e veprimtarive të jashtëligjshme të lojërave të fatit, ka finalizuar operacionin policor të koduar “Lucky ticket”.
Gjatë operacionit u arrestuan në flagrancë shtetasit K. S., 35 vjeç, dhe B. F., 54 vjeç, banues në Tiranë, për veprën penale “Organizimi ose ushtrimi i veprimtarive të lojërave të fatit në kundërshtim me ligjin”, parashikuar nga neni 197 i Kodit Penal.
Gjithashtu po punohet për kapjen e shtetasit G. H., pronar i një lokali në Rrugën e Barrikadave.
Gjatë kontrolleve të ushtruara në dy lokale në zona të ndryshme të Tiranës, në aparatet celulare të dy shtetasve të arrestuar, u gjetën faqe që shërbejnë për vënien e basteve sportive.
Në cilësinë e provës materiale u sekuestruan aparatet celulare.
Materialet procedurale i kaluan Prokurorisë, për veprime të mëtejshme.
