Në një debat të ashpër në Kuvendin e Shqipërisë, Gazment Bardhi, kreu i grupit parlamentar të Partisë Demokratike, i është përgjigjur zv.kryeministres Belinda Balluku, e cila kishte mbrojtur buxhetin e vitit 2023, duke theksuar rritjen e pagave dhe investimet në sektorin turistik. Bardhi e akuzoi atë për fitime të paligjshme dhe rritje të çmimeve, duke i drejtuar akuza të forta për keqpërdorim të projekteve energjetike.
Bardhi theksoi se “me vetëm një projekt, fute në xhep 50 milionë euro” dhe se vetëm nga shitblerja e energjisë elektrike, qeveria kishte fituar 180 milionë euro. Ai i kujtoi Ballukut se buxheti i vitit 2023 do të mbahej mend për këtë pastrim parash dhe për rritjen dramatike të çmimit të energjisë. “Sa do ta mbajnë mend shqiptarët buxhetin 2023, sepse vetëm nga shitblerja e energjisë elektrike futën në xhep 180 milionë euro,” shtoi Bardhi.
Nga ana e saj, Balluku kishte krahasuar situatën energjetike të sotme me vitin 2007, duke theksuar përmirësimet në furnizimin me energji, si dhe ndihmën që kanë marrë zonat rurale, përfshirë Thethin. Ajo tha se “sot, nëse ndodhin ndërprerje të energjisë në Theth, ndërhyjmë brenda 20 minutash”, një arritje që e cilësoi si përmirësim krahasuar me vitin 2007.
Bardhi i kujtoi se, gjatë qeverisjes së PD-së, energjia elektrike u sigurua pa rritur çmimet, ndërsa gjatë periudhës së qeverisjes së PS-së, çmimi i energjisë është rritur me 70%, duke e quajtur këtë veprim të dëmshëm për qytetarët shqiptarë. “Ajo flet dhe ikën, por gënjeshtrat nuk mbulojnë dot të vërtetën,” tha Bardhi.
Në fund, Bardhi komentoi për veshjen e zv.kryeministres, duke e përdorur si një shembull për të treguar se përmirësimi i mirëqenies së qeveritarëve nuk duhet ngatërruar me mirëqenien e qytetarëve. Ai e përmbylli fjalën e tij duke theksuar se janë betuar për mirëqenien e qytetarëve, dhe jo për të mirëqenien e Belinda Ballukut.
