Pas më shumë se dy vjetësh punimesh për ristrukturimin e Camp Nou, Barcelona do të rikthehet në stadiumin e saj më 7 nëntor për një seancë stërvitore të hapur për publikun. Klubi e bëri të ditur këtë lajm nëpërmjet një komunikate për shtyp, ku theksoi se skuadra do të kthehet zyrtarisht në Spotify Camp Nou.
Kjo nismë do të shërbejë si një test operativ në kuadër të një rihapje të pjesshme të stadiumit, që është shtyrë disa herë gjatë vitit. Çmimi i biletave është vendosur në 5 euro për abonentët dhe 10 euro për publikun e përgjithshëm, me të ardhurat që do të shkojnë për projektin bamirës “Pulseras Blaugranas”, i cili mbështet shëndetin mendor të fëmijëve dhe adoleshentëve të shtruar në spital.
Sipas lejes së marrë nga Këshilli Bashkiak i Barcelonës, stadiumi do të ketë 23 mijë spektatorë, ndonëse ka një kapacitet maksimal prej 27 mijë personash. Megjithatë, skuadra do të vazhdojë të luajë në Stadiumin e Montjuis, në pritje të lejes për t’u rikthyer në Camp Nou, ku kapaciteti arrin deri në 45 mijë persona.
Vonesat në ndërtim kanë sjellë humbje të mëdha financiare për klubin, i cili ka përllogaritur se kostoja e ristrukturimit të Camp Nou do të arrijë në 1.5 miliardë euro, duke u bërë kështu një nga projektet më të shtrenjta për stadiumet në Evropë. Ky stadium, pasi të përfundojë përmirësimin, do të ketë një kapacitet prej 105 mijë vendesh, duke vendosur një rekord në nivel evropian.
Shpresat e klubit janë që rikthimi në Camp Nou të ofrojë një frymëmarrje të re për skuadrën dhe tifozët e saj, duke evidentuar rëndësinë e këtij impianti historik për identitetin e Barcelonës dhe për suksesin e saj në fushën e lojës.
