Napoli ka përjetuar një tjetër rezultat zhgënjyes në ‘Maradona Stadium’, duke barazuar pa gola me Eintrachtin e Frankfurtit. Kjo ndeshje ka lënë një shije të hidhur, veçanërisht për trajnerin Antonio Conte, pasi skuadra kampione e Italisë ndodhet aktualisht në vendin e 19 në klasifikimin e League Phase, me vetëm 4 pikë, ndërsa fitorja e saj e vetme ka qenë ndaj Sporting Lisbonë muajin e kaluar.
Situata për skuadrën e Contes po bëhet gjithnjë e më e ndërlikuar, me Ligën e Kampioneve që po merr karakter negativ për ta. “Mund të flasim shumë, por nëse nuk shënon, nuk fiton,” tha Conte, duke shprehur shqetësim për stilin e lojës së rivalëve gjermanë, të cilët, sipas tij, kanë mësuar të aplikojnë “catenaccio”-n italian. Ai theksoi se nëse Napoli do të kishte luajtur në këtë mënyrë, do të ishte kritikuar për futboll të vjetëruar.
Megjithatë, Conte shprehu kënaqësi për paraqitjen e lojtarëve, duke nënvizuar se ata kishin pasur shanse të mira. “Nuk mund t’i qortoj lojtarët për asgjë. Kemi ambicien për t’u rritur, por duhet të kuptojmë se situata është e vështirë. Mendoj se po e përballojmë situatën sa më mirë të mundemi,” shtoi ai.
Një faktor tjetër që e bën situatën më të komplikuar për Napolin janë dëmtimet, sidomos ajo e Kevin De Bruyne. Conte e pranoi se pa De Bruyne, skuadra do të duhet të gjejë zgjidhje alternative. Ai përmendi se Elmas kishte marrë një rol organizues në ndeshjen e fundit, kur vendosen të mos rrezikonin më Lobotkën.
Duke u shprehur optimist, Conte shprehu se djemtë dhanë maksimumin dhe se, nëse arriten të zhbllokohen, gjithçka mund të ndryshojë. Ai e përfundoi duke theksuar rëndësinë e mbështetjes nga tifozët: “’Maradona’ duhet të ndizet dhe të na ndihmojë. Ne po japin maksimumin, e tani është koha që të tjerët të gjykojnë dhe të marrin vendime.”
