Në orët e para të mëngjesit, ekipet dhe mjetet shtesë të Bashkisë Tropojë janë nisur drejt Bjeshkës së Javorrit për t’u ofruar ndihmë banorëve të bllokuar nga reshjet e shumta të dëborës. Aktualisht, ekipet kanë arritur deri në Qafën e Markofçes, ku po hasin vështirësi të mëdha në hapjen dhe pastrimin e rrugës, e cila është e bllokuar në disa segmente për shkak të stuhive të dëborës dhe erës së fortë.
Rreth orës 07:30, është bërë i mundur kontakti me Arbër Sokolaj, që ka konfirmuar se gjendja e familjarëve të tij, të bllokuar nga dëbora, është e mirë dhe pa probleme shëndetësore. Efektiviteti i operacioneve të shpëtimit dhe monitorimit të situatës vazhdon të jetë në fokus, për të siguruar që banorët të kenë akses dhe ndihmën e nevojshme.
