Ish-deputeti i PD-së, Myslim Murrizi, në një lidhje me emisionin “Të Paekspozuarit” në MCN TV, akuzoi dy partitë e mëdha, PS dhe PD se kanë qenë pas skandalit të kompanisë Bankers.
Murrizi deklaroi se prej 21 vjetësh kjo kompani ka marrë gati 10 miliardë euro të shqiptarëve dhe nuk ka paguar asgjë.
“Që prej 2004, jam i vetmi politikan që kam folur në Parlament tre herë për Bankers. Kam shkuar te Uzina dhe kam bërë konferencë shtypi. Te SPAK ka rënë në vesh të shurdër dhe jam habitur që çështja ka nisur nga prokuroria e Fierit.
Sipas investimit tim kanë nxjerrë 1.5 mln ton naftë.
Unë dyshoj se u shndërrua në skrap uzina e Ballshit, që të mos kishte më përpunim të naftës në vendin tonë, edhe pse Rama premtoi në 2013 që nuk do të sillemi si hajdutët e PD, por do ta furnizojmë rafinerinë me naftë vendase.
Janë 6 vendimet të Autoritetit të Konkurencës që e gjobisnin Bankers.
Asnjë vendim nuk u ekzekutua.
Hetimi doganor, e ka gjobitur 100 mln euro dhe në mënyrë arbitrare është pezulluar gjoba me urdhër të Anila Denaj, pa patur kompetencë, sepse gjobat ankimohen në apelin e doganës, pastaj në gjykatë administrative.
Kur ishte PD në pushtet, Bankers e mbronin ish-ministrat e PS. Sot e mbrojnë ish-ministrat e PD.
21 vjet që nuk belbëzon askush, ka një heshtje, jeni i parë emision dhe tv që po bëni për Bankers. Që dje ka rënë heshtje varri.
Sot pashë dërdëllisje të disa deputetëtve që kërkonin llogari një, Malaj, Malaj. Bankersi ka marrë 10 mld euro pasuri shqiptarësh dhe paguan zero tatim fitim. Një shoqëri që del 3 vjet rresht me humbje, shpall falimentin.
SPAK merr Bektashin dhe Edvin Priftin, por jo këtë”-tha Murrizi.
