Rezistenca e bakterieve ndaj antibiotikëve është bërë një nga kërcënimet më të mëdha për shëndetin global. Statistikat tregojnë se 1 në 6 infeksione është e papërballueshme për antibiotikët, pasi bakteriet kanë zhvilluar mekanizma mbrojtjeje. Mikroblologu Andi Koraqi thekson se problemi është më i gjerë, duke e përfshirë gati 90% të antibiotikëve në treg, të cilët po humbasin efikasitetin e tyre përballë mikroorganizmave gjithnjë e më rezistente.
Sipas ekspertëve, parashikimet e ardhshme sugjerojnë se vdekjet për shkak të infeksioneve, e sidomos antibiotiko-rezistencës, do të tejkalojnë ato nga sëmundjet kardiake dhe onkologjike. Koraqi thekson se deri në vitin 2050, dy të tretat e vdekjeve në botë mund të jenë një pasojë e këtij fenomeni shqetësues.
Një tjetër shqetësim është shpejtësia me të cilën mikroorganizmat zhvillojnë rezistencë. Koraqi shpjegon se, ndërsa prodhimi i një antibiotiku të ri mund të zgjatë deri në 30 vjet, mikroorganizmat e fitojnë rezistencën ndaj tij brenda vetëm pesë vjetësh. Kjo situatë e bën më të vështirë luftën kundër infeksioneve, duke e ulur efikasitetin e mjekimeve të disponueshme.
Antibiotiko-rezistenca ka tejkaluar tashmë fushën e mjekësisë, duke u shfaqur gjithashtu në ushqim, mjedis, bujqësi, dhe blegtori, ku përdorimi i pa kriter i antibiotikëve po kontribuon në përkeqësimin e situatës. Çështja kërkon një ndërhyrje të menjëhershme dhe strategji të reja për menaxhimin e përdorimit të këtyre substancave dhe mbrojtjen e shëndetit publik.
Ky fenomen paraqet sfida të ndërlikuara, që kërkojnë bashkëpunim ndërkombëtar dhe angazhim të thellë nga të gjithë sektorët e shëndetit dhe të prodhimit të ushqimit për të luftuar pasojat e tij, përndryshe, pasojat mund të jenë katastrofike.
