Një avion ushtarak turk i tipit C-130 është rrëzuar në kufirin midis Gjeorgjisë dhe Azerbajxhanit. Sipas njoftimit zyrtar, avioni kishte nisur nga Azerbajxhani me destinacion Turqinë, por humbi kontaktin dhe ra në një zonë malore. Në bord ndodheshin 20 persona, përfshirë pasagjerë dhe anëtarë të ekuipazhit.
Ministria e Mbrojtjes turke konfirmoi aksidentin dhe deklaroi se operacionet e kërkim-shpëtimit po zhvillohen në bashkëpunim me autoritetet e Gjeorgjisë dhe Azerbajxhanit. Në rrjetet sociale janë publikuar video dhe foto që tregojnë pjesë të avionit pas rrëzimit, ndërsa informacionet mbi shkakun e aksidentit dhe gjendjen e pasagjerëve ende mungojnë.
Presidenti turk, Recep Tayyip Erdoğan, shprehu ngushëllimet e tij, duke shprehur shqetësimin për humbjet e mundshme. Ai tha: “Shpresojmë që do të dalim nga ky aksident me humbje minimale.” Po ashtu, Ministri i Brendshëm turk, Ali Yerlikaya, njoftoi se ka komunikuar me homologun e tij gjeorgjian rreth situatës në vendin e ngjarjes.
Avioni C-130 Hercules, i prodhuar nga Lockheed Martin, është një nga mjetet më të përdorura të transportit ushtarak dhe ka qenë në shërbim që nga viti 1954, duke u operuar nga mbi 60 vende. Forcat Ajrore Turke e përdorin atë që prej vitit 1963.
Shkaqet e rrëzimit mbeten ende të panjohura, ndërsa vazhdon kërkimi i personave të mbetur.
