Një avion pasagjerësh që udhëtonte nga Mbretëria e Bashkuar drejt Egjiptit ka bërë një ulje emergjente në Kretë për shkak të sjelljes së çuditshme të një pasagjereje britanike 38-vjeçare. E cila, e shoqëruar nga bashkëshorti dhe fëmija i saj, duket se ishte në gjendje të dehur dhe refuzoi të zbatonte udhëzimet e ekuipazhit, duke shkaktuar rrezik për sigurinë e fluturimit.
Për të siguruar rendin dhe sigurinë, kapiteni vendosi të devijonte avionin dhe e ul në aeroportin e Heraklionit, ku policia greke e arrestoi gruan menjëherë pas hapjes së dyerve të aeroplanit. Në këtë mënyrë, ajo nuk arriti të mbërrinte në destinacionin e saj për pushime në Egjipt, por përfundoi në paraburgim, ku pritet të përballet me akuza për sjellje të rrezikshme në bord.
Udhëtarë të tjerë në avion e përshkruan gruan si “jashtë kontrollit”, dhe ngjarja ka sjellë shqetësime rreth rritjes së rasteve të tilla në fluturime. Kompanitë ajrore kanë nënvizuar se këto incidente, përveç që rrezikojnë sigurinë e pasagjereve, shkaktojnë vonesa të gjata dhe kosto të mëdha financiare.
Ky rast nuk është i vetëm; vetëm këtë javë, një fluturim tjetër i Ryanair nga Londra për në Alicante u detyrua të ulej në Tuluzë pas tentatives së një pasagjeri për të hapur daljen emergjente. Po ashtu, muajin e kaluar, një fluturim nga Mançesteri për në Ibiza përjetoi një vonesë për shkak të një pasagjeri të dehur që refuzoi të vendoste rripin e sigurimit dhe u nxor zvarrë nga policia, duke shkaktuar irritimin e udhëtarëve të tjerë.
Këto incidente shërbejnë si një kujtesë për fluturuesit mbi rëndësinë e respektimit të rregullave dhe udhëzimeve gjatë fluturimeve, duke nënvizuar se sjelljet e papërshtatshme mund të kenë pasoja të rrezikshme dhe të kushtueshme.
