Shkroi: Jane Doe
Fik Deti është drejtori më i ri i prodhimit në trupën e re të Cirkut të Diellit në Radio Televizionin e Rilindur Shqiptar (kape me dorë mos e marrim më sysh).
Fiku është një djalosh i ri me shumë eksperiencë në fushën e gurëve të peshave, kandarit, litarit, etj. si këto, eksperiencë për të cilën është bërë dhe drejtori më i ri emeritus i prodhimit në RTSH, emëruar brenda gjithë rregullave e ligjeve të Komandantit Suprem (ashtu si gjithë drejtuesit e tjerë).
Fiku i Detit po e shpalos më së miri në fare pak kohë në detyrën e re eksperiencën e tij të çmuar. Që kur shkeli në Cirk, i iku drejtoresha e montazhit, një nga më profesionistet në fushën e vet. Por ajo nuk i njihte mirë gurët e nuk merrte vesh nga peshat, nuk i “luajti” mirë me pak fjalë. Por nuk ka problem! Shumë shpejt, Fiku do ulet të montojë vetë… pse pak video në Tik Tok ka montuar ai!…
Fiku nuk mendon vetëm për departamentin që drejton. Që mos ngelte sektori i shoferëve pa drejtor, sa hap e mbyll sytë propozon kushëririn e tij në këtë pozicion. Kushëriri, Jean Claude, një djalë i qetë në dukje, sa nis punë godet me grushta shefin e sektorit të sportit, Arsen Lupenin, shumë shëndetlig e thatim për të mbajtur dhunë të tillë mbi supe. Fiku u fik! Ç’të bën kushëriri s’ta bën as mbreti i filmave aksion Jackie Chan.
Historia nuk mbaron këtu. Lideri suprem informohet për çështjen e grushtave të nxehtë dhe e bind Lupenin që të heshtë, e mos ta bëjë të madhe ngjarjen, se në fakt grushtat për burrat janë. Hezitimi i Lupenit për ta denoncuar Jean Claude në polici kthehet në mohim, kur gruaja e tij e bind të mos e denoncojë, me idenë që Zhani është budalla dhe nuk ia vlen me u marrë me të.
Presione të mëdha për Fikun tonë, nga një anë dorëheqjet, nga ana tjetër stafi i vet që nuk e di #çadokyktu, dyluftimet marciale, etj, etj… Fiku s’ka nga të rrotullohet. Por ashtu si gjithë sukulentët e tjerë, ai e gjen vetë rrugën drejt çeljes.
Atëherë kur të gjithë menduan se Fiku do rezistonte 24 orë dhe do largohej drejt brigjeve të reja, aty ai i shokon të gjithë: vjen ndryshe, me një strategji të re: të ruajmë rendin në sektor, duke xhiruar punonjësit dhe prezencat në zyra. Ky mision i ri i shoqëruar me video të filmuara nga vendi i ngjarjes do të dëshmojë që problemi nuk është ai, por vartësit e vet të cilët shkelin rregullat e Liderit Suprem.
Edhe kujdes! Mendohuni mirë kur të kryeni nevojat personale, pasi Fiku ju vëzhgon… ndjesë: ju xhiron!
Post Scriptum: vijojmë me episode të reja.
