Shtetasi Kamber Sulçaj, i dyshuar për vrasjen e italianit Edoardo Sarchi, ka dorëzuar veten në polici pas ngjarjes së ndodhur më 26 shtator 2025. Trupi i pajetë i Sarchit u gjet në “Qafën e Dilanit.” Policia njoftoi se Sulçaj ka dorëzuar gjithashtu armën e gjahut, e cila dyshohet se është përdorur në krim, si dhe lejen për posedimin e saj.
Specialistët për Hetimin e Krimeve të Rënda të DVP Gjirokastër po kryejnë veprimet procedurale për të ekzekutuar masën e sigurisë “Arrest në burg,” e caktuar nga Gjykata e Gjirokastrës për Kamber Sulçajn, 48 vjeç, banues në fshatin Mesaplik të Vlorës. Ai akuzohet për vrasje në rrethana të tjera cilësuese, mbajtje dhe prodhim të armëve dhe narkotikëve.
Sipas hetimeve, K. Sulçaj dyshohet se ka qëlluar me armë gjahu ndaj Sarchit dhe disa personave që e shoqëronin atë, si dhe ndaj automjeteve që ndodheshin në aksin “Nivicë-Salari.” Si rezultat i të shtënave, Edoardo Sarchi humbi jetën. Materialet procedurale janë dërguar pranë Prokurorisë së Gjirokastrës për veprime të mëtejshme, ndërkohë që hetimet vazhdojnë për të sqaruar rrethanat e plota të këtij krimi të rëndë.
