SHKODËR- Detaje të reja janë zbardhur në lidhje me atentatin e regjistruar mbrëmjën e djeshme në Shkodër ku u plagosën studenti i Akademisë së Sigurisë, Gjergj Ndërshtiqaj 28-vjeç dhe kunati i tij Gjon Nika, 30-vjeç. Mësohet se të plagosurit ndodhen jashtë rrezikut për jetën ndërsa është raportuar se ndaj tyre është qëlluar me 106 plumba.
Pas ngjarjes së rëndë tre automatikë kallashnikov janë gjetur në automjetin e djegur të autorëve ndërsa janë sekuestruar nga policia si provë materiale. Dyshohet se mjeti është i përfshirë nga flakët për shkak të breshërisë së plumbave. Sipas raportimeve në makinë kanë qenë tre persona, ku dy prej tyre kanë mbetur të plagosur.
Ngjarja ka ndodhur afër një lokali i cili kishte kamera sigurie dhe policia po bën kqyerjen e tyre për identifikimin e autorëve. Sipas burimeve policore objektivi ka qenë Gjon Nika. Ndërkohë janë zbardhur edhe dëshmitë e të plagosurve të cilët janë shprehur se nuk kanë arritur që të shohin se kush ishin autorët. Ata gjithashtu kanë shtuar se nuk kanë konflikte.
“Sapo zbritëm nga makina dëgjuam të shtëna armësh. Nuk kemi arritur që të shohim se kush ishin ata që na qëlluan me armë. Nuk kemi konflikte me persona të tjerë dhe nuk e dimë arsyen përse na qëlluan. Në momentin kur nisën të shtënat kemi lëvizur me shpejtësi duke u munduar të shpëtojmë. Derisa janë larguar qëndruam pas makinës,” u shprehën ata.
Ende është e paqartë se cili është motivi i kësaj ngjarje të rëndë ndërsa policia ka shoqëruar disa persona por pa arritur ende tek autorët e dyshuar.
