Ka të dy djemtë e tij të mitur në spital, por Gentjan Bejtja ende nuk ka shkuar që t’i vizitojë. E po ashtu, as Policia e Shtetit nuk ka ende gjurmë të shënjestrës së atentatit, prej të cilit ndërroi jetë kunati i tij, Ramazan Sino pranë banesës së tyre në Larushkë të Krujës.
Gazetarja Klodiana Lala raporton se 10-vjeçari është jashtë rrezikut për jetën dhe ka mundur të flasë për grupin hetimor, por do të merret sërish në pyetje me detaje nën prezencën e një psikologu; ndërsa vëllai i tij 13-vjeçar është në gjendje më të stabilizuar, por mjekët nuk e konsiderojnë ende se e ka kaluar rrezikun.
Sipas saj, në zonë është e njohur përplasja që Bejtja ka me vëllezërit Bami dhe Marklen Hakën, të tre të marrë në pyetje lidhur me ngjarjen, por shtoi se asnjë prej tyre nuk ka pranuar asgjë gjatë marrjes në pyetje nga Policia e Krujës. E megjithatë, sipas Lalës, përplasja është bërë me dije nga burime operative në zonë, madje prej kohësh Bejtja është vendosur në Lezhë, ku edhe është marrë në mbrojtje nga një tjetër grup kriminal. Por nuk e përjashtoi mundësinë që nëse kapet, Gentjan Bejtjas mund t’i ofrohet edhe statusi i të penduarit nga drejtësia, pasi është një personazh që mund të zbulojë shumë ngjarje kriminale në zonën ku ai banon.
Gentian Bejtja është një personazh me shumë dritëhije i botës së krimit. Ai ka qenë mik i ngushtë me Enver Stafukën i cili rezulton i zhdukur prej 8 vitesh dhe së bashku dyshohet të jenë përfshirë në vrasjen e kryekomisarit Dritan Lamaj. E po ashtu, është personi që kontaktoi i fundit me biznesmenin e vrarë të kromit Iljaz Calit. Deri më sot, ai u ka shpëtuar 2 atentateve.
