Presidentja Vjosa Osmani ka komentuar sot në mbrëmje nënshkrimin e ‘Bordit të Paqes’ në Davos, një ngjarje që ajo e përshkroi si historike për Kosovën. Gjatë një lidhjeje në ‘Top Story’, Osmani theksoi se Shtetet e Bashkuara nuk i kërkuan Kosovës asnjë kontribut financiar për anëtarësimin e saj, duke e konsideruar këtë ditë si një mundësi për të forcuar pozitat e vendit në arenën ndërkombëtare.
Ajo sqaroi se ftesa për t’u bërë anëtare themeluese e Bordit të Paqes u mor më 20 janar, dhe njëkohësisht u ftuan për nënshkrim në Davos. “Kjo është një ditë me peshë historike. Anëtarësimi në çdo organizatë ndërkombëtare ka rëndësi për ne, pasi na jep një peshë më të madhe historike dhe fuqizon pozitat tona”, tha Osmani. Ajo shprehu besimin se ky hap do t’i mundësojë Kosovës të garantojë barazinë mes kombeve të lira dhe do të ndihmojë në shfrytëzimin e potencialeve të saj.
Osmani theksoi se në Kartën e Bordit të Paqes dhe në bisedat me Shtëpinë e Bardhë, nuk është përmendur ndonjë kontribut financiar nga ana e Kosovës. Ajo u shpreh se organizata do të funksionojë në bazë të kontributeve vullnetarë, duke theksuar se Kosova, duke qenë një shembull i zhvillimit të demokracisë pas luftës, ka shumë për të kontribuar.
Ajo shprehu gjithashtu kënaqësi që Kosova do të jetë së bashku me Shqipërinë në këtë iniciativë, duke e cilësuar si një mundësi të shkëlqyer për të faktorizuar kombin shqiptar brenda një organizate të tillë. “Është shumë e rëndësishme që edhe Shqipëria është e ftuar. Kjo na lejon të bashkëpunojmë dhe të forcojmë më tej kombin shqiptar”, përfundoi Osmani.
Kjo ngjarje e rëndësishme shënon një hap të ri për Kosovën, duke e afirmuar atë në skenën ndërkombëtare dhe duke ofruar mundësi për zhvillim e bashkëpunim të rinj.
