Gazetari investigativ shqiptar Artan Hoxha është shpallur “non grata” në Greqi dhe i është ndaluar përjetësisht hyrja në këtë shtet. Ky vendim iu komunikua atij gjatë kontrollit të pasaportave në kufirin grek në Kakavijë, ku iu tha se konsiderohej si “rrezik për rendin publik dhe sigurinë e brendshme”. Pasaporta e Hoxhës u mor dhe u vendos një kryq në vulën hyrës, duke e mbajtur atë për rreth një orë në ambientet e Policisë greke.
Në dokumentin e dorëzuar, arsyetohet se Hoxha “Është karakterizuar si person i padëshirueshëm” dhe konsiderohet i rrezikshëm për rendin publik, sigurinë, shëndetin publik dhe marrëdhëniet ndërkombëtare të disa shteteve të Bashkimit Evropian. Vendimi për shpalljen e tij “non grata” është marrë në fillim të vitit 2024, në një periudhë kur çështja e Fredi Belerit ishte në qendër të vëmendjes në Shqipëri.
I kontaktuar nga Top Channel, Hoxha shprehu se ky vendim nuk e ka befasuar, duke shtuar se ishte në drejtim të Janinës kur Policia e kufirit e ndaloi për të kaluar në vijën e dytë të kontrollit për shkak të një vendimi penalizmi. Autoritetet greke i shpjeguan se kjo masë erdhi si pasojë e qëndrimeve të tij si gazetar për vite me radhë, të cilat u konsideruan kundër interesave të shtetit grek.
Ky është një rast i ndodhur më parë, pasi në vitin 2012, gazetari tjetër shqiptar Marin Mema u shpall gjithashtu “non grata” nga Greqia. Këto incidente ngrisin shqetësime mbi lirinë e shtypit dhe trajtimin e gazetarëve në raport me autoritetet greke, duke reflektuar një atmosferë të tensionuar në marrëdhëniet mes vendeve.
