TURQI- Një nga krerët e bandave më të kërkuara të Suedisë, Ismail Abdo, është arrestuar në Turqi. Sipas agjencisë globale të policisë, Interpol, kundër tij rëndojnë një listë e gjatë akuzash për drogë, me shtetësi të dyfishtë suedeze dhe turke. 35-vjeçari, me nofkën Luleshtrydhe, është një udhëheqës i njohur i bandës kriminale Rumba në Suedi, shkruan BBC.
Ai akuzohet për orkestrimin e operacioneve të paligjshme nga jashtë dhe ka qenë subjekt i një njoftimi të kuq të Interpolit që nga viti i kaluar. Policia suedeze nuk e identifikoi atë, por konfirmoi arrestimin e një burri “të dyshuar për përfshirje në trafik të rëndë droge dhe nxitje të krimeve të rënda të dhunshme” për shumë vite në Suedi.
Ai ishte një nga 19 personat që u arrestuan gjatë bastisjeve në Turqi, ku oficerët sekuestruan më shumë se një ton drogë. Gjithashtu urdhëra arresti u lëshuan për 21 të dyshuar të tjerë, nga të cilët 14 besohet se janë jashtë vendit dhe tre janë tashmë në paraburgim për akuza të tjera.
Autoritetet turke thuhet se sekuestruan asete me vlerë rreth 1.5 miliardë lira turke (27.8 milionë paund; 38 milionë dollarë), duke përfshirë 20 automjete, llogari bankare dhe 51 prona të paluajtshme. Dhuna midis bandave në Suedi është përshkallëzuar vitet e fundit, pjesërisht sepse ish-shoqja e Abdos, Rawa Majida, është udhëheqësja e një bande rivale, Foxtrot.
Shumë njerëz janë vrarë që kur filloi lufta e tyre vdekjeprurëse për territor. Ajo hyri në një kapitull të ri dhe të dhunshëm në vitin 2023 kur nëna e Abdos u vra në shtëpinë e saj në Uppsala, në veri të kryeqytetit, Stokholm. Përshkallëzimi e shtyu qeverinë të angazhojë ushtrinë për të ndihmuar në përballimin e rritjes së vrasjeve nga bandat.
Rritja e dhunës së bandave që ka prekur disa nga qytetet më të mëdha të Suedisë dhe është përhapur në periferi dhe qyteza më të qeta, ka shkatërruar reputacionin e saj si një komb i sigurt dhe paqësor. Sipas një raporti të policisë vitin e kaluar, rreth 14,000 njerëz në Suedi janë të kapur në bandat kriminale dhe thuhet se 48,000 të tjerë janë të lidhur me to
