Policia italiane arrestoi Roberto Mazzarellan, bosin e Kamorrës dhe një ndër personat më të kërkuar në vend. Mazzarella, kreu i klanit me të njëjtin emër që operon në Napoli, u kap pas më shumë se një viti në arrati. Ai fshihej në një resort luksoz në bregdetin Amalfitan, ku kishte rezervuar me identitet të rremë për të festuar Pashkët me familjen.
I moshës 48 vjeçare, Mazzarella nuk bëri rezistencë gjatë arrestimit. Autoritetet sekuestruan nga ambientet ku qëndronte një sasi të madhe parash, rreth 20 mijë euro, ora luksoze, dokumente të falsifikuara, telefona dhe materiale që dyshohen të lidhen me aktivitetet e klanit të tij.
Ai ishte shpallur në kërkim që nga 28 janari 2025 dhe akuzohet për vrasje në rrethana mafioze, duke përfshirë një ngjarje kriminale të ndodhur në vitin 2000, e cila lidhet me hakmarrjen mes klaneve. Mazzarella ishte një ndër të arratisurit më të rrezikshëm, renditur i katërti nga Ministria e Brendshme italiane.
Ky arrestim shënon një tjetër hap përpara në luftën kundër organizatave kriminale në Itali, duke pasuruar listën e personave të kapur që i përkasin strukturave të fuqishme mafioze.
