Një punonjës policie është arrestuar në flagrancë për kultivim lëndësh narkotike dhe mbajtje armësh pa leje. Agjencia e Mbikëqyrjes Policore, në bashkëpunim me Policinë e Krujës dhe DVP Tiranë, realizoi operacionin “Bashkëpunimi” nën drejtimin e Prokurorisë Pranë Gjykatës së Shkallës së Parë të Juridiksionit të Përgjithshëm Tiranë.
I arrestuari, E. L., që ushtronte detyrën si pjesëtar i Patrullës së Përgjithshme në Komisariatin e Policisë Fushë-Krujë, dyshohet se ka kultivuar bimë narkotike dhe ka mbajtur armë të paligjshme. Hetimet zbuluan se ai dhe vëllai i tij, Ç. L., i shpallur në kërkim, ishin të pranishëm në një zonë pyjore në Njësinë Administrative Cudhi, Krujë, ku janë gjetur 65 bimë të dyshuara si Cannabis Sattiva.
Pas konstatoj të policisë, të dy vëllezërit u larguan për t’i shpëtuar kapjes. Gjatë kontrollit fizik të E. L., iu gjetën dy armë zjarri, tipe pistoletë, dhe një sasi fishekësh. Po ashtu, një kontroll në banesën e tij zbuloi sasi të tjera fishekësh, të cilat u sekuestruan si prova materiale.
Materialet janë dërguar në Prokurorinë e Tiranës për procedura të mëtejshme. Ky rast thekson shqetësimin mbi përfshirjen e punonjësve të policisë në aktivitete kriminale dhe nevojën për përmirësimin e mbikëqyrjes ndaj kësaj institucioni.
