Policia australiane ka arrestuar një nënë dhe vajzën e saj në Sydney, të akuzuar për një mashtrim financiar të rëndë ndaj komunitetit vietnamese në Australi, me një dëm të përllogaritur prej 46 milionë dollarësh australianë. Të dyshuarat janë identifikuar si pjesë e një sindikate kriminale të organizuar, e specializuar në pastrim parash dhe mashtrime financiare.
Arrestimi u realizua në një rezidencë luksoze në Dover Heights, ku policia sekuestroi një sasi të madhe pasurish, përfshirë një shufër ari 40 gramëshe, çanta luksoze dhe dokumente që lidhin dyshen me aktivitetet e paligjshme. Hetimet e mëvonshme zbuluan se asete të tjera mund të arrijnë deri në 60 milionë dollarë australianë.
Sipas hetimeve, nëna e dyshuar, një fallxhore dhe ekspert i feng shui, kishte ndihmuar në mashtrimin e viktimave të papërgatitura financiarisht, duke i bindur ata se do të bëheshin miliarderë në të ardhmen. Shumica e viktimave ishin persona që morën kredi për të investuar në projekte të pasigurta, me shpresën për mbështetje nga një sipërmarrës i suksesshëm, siç ishte parashikuar nga fallxhorja.
Ky rast ka marrë vëmendje të madhe, pasi operacioni “Strike Force Myddleton” ka zbuluar një sindikatë të gjerë, e përfshirë në mashtrime me kredi për makina luksoze dhe pastrimin e parave. Hetuesit besojnë se grupi përdorte identitete të vjedhura për të marrë kredi për makina që nuk ekzistonin dhe për të blerë prona të shtrenjta në Sydney.
Policia ka njoftuar se pret arrestime të tjera të lidhura me këtë rast, përfshirë profesionistë si avokatë, kontabilistë dhe zhvillues të pasurive. Hetimet vazhdojnë për të zbardhur kompleksitetin e kësaj sindikate dhe për të identifikuar individë të tjerë të përfshirë në mashtrimin financiar.
