Një 46-vjeçar, i identifikuar me inicialet Gj.G., është arrestuar pas shpalljes në kërkim për kultivim droge. Ai akuzohet si bashkëpunëtor në përshtatjen e dy ambienteve të destinuara për kultivimin e bimëve narkotike në fshatin Barbullush.
Sipas informacioneve, nga këto ambiente janë sekuestruar 583 bimë narkotike kanabis, rreth 7.5 kg kanabis dhe 307 pajisje elektrike të specializuara për këtë proces. Arrestimi i tij është realizuar nga Specialistët e Seksionit për Hetimin e Krimeve të Komisariatit të Policisë Vau i Dejës si pjesë e operacionit të koduar “Neonët 5”.
Gjykata e Shkallës së Parë e Juridiksionit të Përgjithshëm Shkodër i ka caktuar atij masën e sigurisë “Arrest në burg”, për veprat penale të kultivimit dhe prodhimit të narkotikëve, si dhe për vjedhjen e energjisë elektrike ose impulseve telefonike, të gjitha të kryera në bashkëpunim.
Policia vazhdon punën për kapjen e individëve të tjerë që janë shpallur në kërkim në kuadër të këtij operacioni. Materialet procedurale të rastit janë referuar Prokurorisë së Shkodrës për të vazhduar me procedurat e mëtejshme.
