Operacioni policor i koduar “Transporter” përfundoi me sukses, duke goditur veprimtarinë kriminale në fushën e narkotikëve. Rreth 23 kg e 65 gramë lëndë narkotike Cannabis Sativa u sekuestruan gjatë operacionit, ndërsa një 43-vjeçar, identifikuar si shtetasi kosovar L. Ç., u arrestua.
Komisariati i Policisë Krujë, në bashkëpunim me Seksionin për Hetimin e Narkotikëve të DVP Tiranë, organizoi operacionin pas informacioneve të siguruara në rrugë operative. Gjatë operacionit, policia ndaloi një automjet tip “Skoda” në vendin e quajtur “Ura e Stafukës” në fshatin Larushk. Brenda mjetit u gjetën disa pako me lëndën e dyshuar narkotike, e cila sipas hetimeve ishte e destinuar për të trafikuar drejt Kosovës.
Lënda narkotike dhe automjeti u sekuestruan si prova materiale. Policia ka njoftuar se hetimet po vazhdojnë për dokumentimin e plotë të veprimtarisë kriminale, si dhe për identifikimin e personave të tjerë që mund të jenë të përfshirë në këtë rast. Materialet procedurale janë dërguar në Prokurori për veprime të mëtejshme.
