Pas katër ditësh ndjekjeje, policia shqiptare ka arrestuar një 28-vjeçar kolumbian, Duvan Gomez, i shpallur në kërkim për rekrutimin e vajzave nga Amerika Latine për prostitucion në Shqipëri. Arrestimi u realizua në pikën kufitare të Muriqanit si pjesë e operacionit “Storm 9”, që synon zbardhjen e veprimtarisë të këtij rrjeti kriminal.
Sipas burimeve zyrtare, Gomez akuzohet për “Trafikim të personave të rritur” dhe “Shfrytëzim prostitucioni”. Hetimet e kryera nga DVP Durrës dhe Policinë Kufitare zbuluan se ai rekrutonte gra kolumbiane me premtimin e punësimit në Shqipëri me një pagë prej 3000 eurosh. Pas mbërritjes ndihmoi në detyrimin e këtyre grave që të ushtronin prostitucion.
Gjatë operacionit, policia sekuestroi gjithashtu tre aparate celularë, të dyshuara për përdorim në organizimin e veprimtarisë kriminale. Operacioni “Storm 9”, i cili kishte zgjatur tre javë, rezultoi gjithashtu me identifikimin e disa personave të tjerë të përfshirë në këtë rrjet dhe zbulimin e një apartamenti në Durrës, ku dy shtetase kolumbiane ishin angazhuar në prostitucion dhe shitje lëndësh narkotike.
Shtetasit kolumbiane dhe veprimtaria e grupit dyshohet se kanë vepruar jo vetëm në Shqipëri, por edhe në vende të tjera të rajonit. Hetimet vijojnë për identifikimin e individëve të tjerë të përfshirë, ndërsa materialet procedurale janë dorëzuar në Prokurorinë e Juridiksionit të Përgjithshëm Durrës për veprime të mëtejshme ndaj të arrestuarit.
