Katër shtetas, tre grekë të moshës 27, 35 dhe 21 vjeç dhe një shqiptar 19-vjeçar, janë arrestuar në Greqi si pjesë e një grupi kriminal ndërkombëtar që merret me importimin e marijuanës hidroponike (skunk). Arrestimi u realizua nga oficerët e Nëndrejtorisë së Narkotikëve, të angazhuar për të parandaluar trafikimin e lëndëve narkotike përmes aeroporteve.
Nëpërmjet një operacioni të detajuar, duke përfshirë verifikime dhe analizën e të dhënave, u konstatua aktiviteti kriminal i të arrestuarve. Gjatë kontrollit në aeroport, 27-vjeçari, i ardhur nga Tajlanda, u kap duke poseduar në dy valixhe 60 pako marijuanë hidroponike me një peshë totale prej 32 kilogramësh. Këto lëndë do t’i dorëzoheshin më vonë me taksi marrësve të tjerë.
Pjesëtarët e tjerë të grupit, 21-vjeçari dhe 19-vjeçari, ishin angazhuar në monitorimin e zonës për të siguruar transportin e drogës dhe shoqëronin taksinë me një automjet tjetër. Po në aeroport, 35-vjeçari u kap duke poseduar tri pako me kokainë, me një peshë totale prej 2.15 gramësh. Kontrollet në shtëpi zbuluan gjithashtu dy pako të tjera me 50.3 gram kanabis, një pako me kokainë që peshonte 30 gramë dhe një kartë identiteti të falsifikuar.
Gjatë operacionit, u konfiskuan gjithashtu taksia, një automjet privat, pesë telefona celularë, dy valixhe dhe një shuma prej 245 eurosh. Tre nga katër të arrestuarit kishin histori kriminale dhe ishin në paraburgim për vepra të ngjashme, ndërsa një prej tyre ndodhej nën masa shtrënguese. Të arrestuarit janë shoqëruar në prokurorinë kompetente për të vijuar procedurat ligjore.
