Presidenti i Serbisë, Aleksandar Vuçiç, thirri një mbledhje urgjente të Këshillit për Siguri Kombëtare, pas ngjarjeve që ai i përshkroi si “krime të papara në skenën politike ndërkombëtare”. Në përfundim të mbledhjes, Vuçiç u shpreh se diskutimet përfshinë tri çështje kryesore: sigurinë ushtarake dhe politike rajonale, sigurinë energjetike, dhe veprimet amerikane në Venezuelë.
Ai theksoi se pozita e Serbisë po bëhet gjithnjë e më komplekse, duke pohuar se rendi global po shembet dhe se rregullat ndërkombëtare nuk funksionojnë më. Vuçiç shprehu shqetësime për të drejtën ndërkombëtare dhe sistemin e Kombeve të Bashkuara, duke thënë se këto egzistojnë vetëm “në letër”. Ai e vlerësoi situatën në Venezuelë si një dëshmi se e drejta ndërkombëtare dhe Karta e OKB-së po dështojnë.
Presidenti theksoi se sot në botë mbizotëron “ligji i forcës”, duke pretenduar se ai që është më i fortë ka pushtet mbi të tjerët. Ai gjithashtu kritikoi reagimet e disa përfaqësuesve evropianë për zhvillimet në Venezuelë, duke i konsideruar si një shenjë të mungesës së parimeve.
Një tjetër çështje shqetësuese për Vuçiçin është armatosja e Kosovës, të cilën e quajti të paligjshme dhe në shkelje të Rezolutës 1244 të Këshillit të Sigurimit të OKB-së. Ai akuzoi fuqitë perëndimore dhe disa aktorë rajonalë, përfshirë Turqinë, se e kanë pezulluar de facto këtë rezolutë.
Më tej, ai përmendi një “Aleancë të re” mes Prishtinës, Tiranës dhe Zagrebit, e cila paraqet një kërcënim për sigurinë dhe sovranitetin e Serbisë. Sipas Vuçiçit, ky bashkëpunim përfshin zhvillimin e sistemeve të avancuara luftarake, duke nënkuptuar se Serbia po ndjek me vëmendje këto zhvillime dhe po përgatitet për mbrojtje nga kërcënime të mundshme.
Në këtë kontekst, Vuçiç shprehu se Republika e Serbisë është e angazhuar të mbrojë parimet e saj dhe të përballet me realitetet e reja që paraqiten në rajon.
