Athina ka dërguar një notë proteste të fortë ndaj ambasadorit të Izraelit në Greqi pas tensioneve që shpërthyen nga ndërhyrja e ushtrisë izraelite ndaj flotiljes ndërkombëtare “Global Sumud Flotilla”, e cila kishte për destinacion Gazën. Kjo veprimtari është bërë në përputhje me urdhrin e Ministrit të Jashtëm, Georgios Gerapetritis, dhe pas demarshëve të mëparshëm verbale.
Reagimi i Athinës erdhi pas komentit nga ministri izraelit i Sigurisë, i cili kërkoi burgosjen e aktivistëve, përfshirë 27 qytetarë grekë, mes të cilëve një deputete dhe dy gazetarë nga Selaniku. Forcat izraelite ndaluan më shumë se 40 anije dhe arrestuan rreth 400 aktivistë të flotiljes, që përpiqeshin të ofronin ndihma humanitare në Gaza. Një delegacion nga Ambasada Greke në Tel Aviv u angazhua për të vizituar të ndaluarit në qendrën e paraburgimit, duke konfirmuar se gjendja shëndetësore e tyre është e mirë, ndërsa autoritetet greke punojnë për riatdhesimin e shpejtë të tyre.
Ky incident ka nxitur reagime të forta politike nga partitë e opozitës, përfshirë PASOK, SYRIZA, Nismën “Lundrimi i Lirisë” dhe “E Majta e Re”. Ato kanë nënshkruar një deklaratë të përbashkët, duke e cilësuar ndërhyrjen izraelite si shkelje të së drejtës ndërkombëtare dhe duke kërkuar lirimin e menjëhershëm të qytetarëve grekë.
Një protestë e re u organizua në Athinë para Ministrisë së Jashtme, ku morën pjesë përfaqësues të shoqatave paqësore, sindikalistë, studentë dhe aktivistë nga organizatat ndërkombëtare si “March to Gaza” dhe “Stop the War”. Pavarësisht tensioneve diplomatike dhe protestave, opozita dhe shoqëria civile kanë një mesazhe të qartë: kërkesa për lirimin dhe kthimin e menjëhershëm të shtetasve grekë në atdhe.
