Pas shkarkimit të drejtorit të IEVP Durrës nga Ministri i Drejtësisë, Besfort Lamallari, u mbajt një takim me drejtuesit e burgjeve në vend. Qëllimi i takimit ishte forcimi i masave për sigurinë dhe parandalimin e futjes së sendeve të paligjshme nëpër burgje.
Ministri urdhëroi Shërbimin e Kontrollit të Brendshëm të përshpejtojë kontrollet në të gjitha Institucionet e Ekzekutimit të Vendimeve Penale (IEVP) në Shqipëri, për të shmangur çdo tentativë për cënim të sigurisë. Në fjalën e tij, Lamallari kërkoi një vlerësim të parametrave të sigurisë dhe rishpërndarjen e IEVP Durrës, duke sugjeruar trasferimin e të dënuarve dhe paraburgosurve me rrezikshmëri të lartë në burgje më të sigurta.
Siguria në burgje u theksua si prioritet absolut, me ministrin që paralajmëroi se asnjë formë neglizhence ose shkelje e procedurave standarde nuk do të tolerohet. Ai theksoi se çdo përpjekje për të sfiduar rendin e brendshëm dhe sigurinë në burgje dëmton sigurinë publike dhe besimin ndaj autoriteteve ligjzbatuese dhe institucioneve të drejtësisë. Në përfundim, Lamallari përmendi se të gjithë ata që do të përshkallëzojnë situatën do të përballen me pasojat ligjore pa vonesa.
