Presidenti i Shteteve të Bashkuara, Donald Trump, njoftoi në Fox News se pengjet e mbajtura në Gaza pritet të lirohen të hënën, si pjesë e fazës së parë të marrëveshjes së armëpushimit mes Izraelit dhe Hamasit. Në një deklaratë, Trump tha se “pengjet do të lirohen” dhe se ai beson se të gjithë do të kthehen në Izrael, duke përfshirë edhe trupat e të vdekurve.
Deklarata e Trump-it erdhi pas njoftimit të marrëveshjes mes Izraelit dhe Hamasit, e cila gjithashtu përfshin shkëmbimin e pengjeve dhe të burgosurve, si dhe një tërheqje graduale të trupave izraelite nga Rripi i Gazës. Presidenti theksoi se Shtetet e Bashkuara do të angazhohen në procesin e rindërtimit të Gazës dhe se do të kontribuojnë për ruajtjen e paqes.
Nga ana tjetër, ushtria izraelite njoftoi se Shefi i Forcave të Armatosura, Gjenerali Eyal Zamir, ka urdhëruar një gatishmëri të lartë operative për kthimin e pengjeve, duke u përgatitur për çdo skenar të mundshëm. Ai theksoi rëndësinë e kryerjes së operacionit për lirimin e pengjeve me “ndjeshmëri dhe profesionalizëm.”
Kjo marrëveshje ka potencialin për të sjellë një ndryshim të rëndësishëm në dinamikën e konfliktit mes dy palëve, duke ofruar një shpresë për një zgjidhje paqësore dhe një fillim të ri për ata që kanë jetuar në këtë konflikt për shumë vite. Lajmet për lirimin e pengjeve janë pritur me interes të madh, pasi ato reprezantojnë një hap të rëndësishëm drejt normalizimit të marrëdhënieve dhe rikthimit të stabilitetit në rajon.
