Gjykata e Posaçme e Apelit ka lënë në fuqi dënimin me burgim të përjetshëm për Laert Haxhinë, i cili ishte ankimuar ndaj vendimit të Gjykatës së Posaçme Antikorrupsion. Haxhiu u dënua si autor i masakrës së Lushnjës, ku dy të rinj, Jurgen Hoxha dhe Zamir Latifi, humbën jetën, ndërsa Marjus Xhepexhiu dhe Bujar Turku u plagosën. Sulmi ishte drejtuar ndaj Xhulio Shkurtit, nipi i Aldo Barës, ish-kreu i bandës së Lushnjës.
Laert Haxhiu, i cili ishte kapur në Janinë me dokumente të falsifikuara greke, me emrin Mikis Askalidis, u ekstradua nga Greqia pas një kërkese të autoriteteve shqiptare, edhe pse ai kishte pretenduar se jeta e tij ishte në rrezik në Shqipëri. Pas vendimit të Apelit, dënimi i tij me burgim të përjetshëm është përfundimtar.
