Më 21 shkurt 2006, ndodhi grabitja më e madhe në historinë e Britanisë së Madhe, kur 53 milion stërlina u morën nga një depo e Bankës së Anglisë në Kent, dy të rinjtë shqiptarë, Jetmir Bucpapa dhe Ermir Hysenaj, luajtën një rol kyç në këtë ngjarje. Pas arrestimit, u zbulua se Hysenaj punonte në depo dhe kishte ndihmuar në organizimin e grabitjes duke filmuar me një kamerë të fshehtë sistemin e sigurisë dhe duke përgatitur një hartë me detaje të depos.
Bucpapa, nga ana tjetër, punonte si roje sigurie dhe kishte lidhje me figura të fuqishme të krimit të organizuar në Kent. Gjatë gjyqit, Hysenaj u përmend si “njeriu i brendshëm” i bandës, duke e realizuar grabitjen me “disiplinë ushtarake”. Grabitësit, të armatosur dhe me maska, lidhën punonjësit e depos dhe morën peng menaxherin Colin Dixon, ndërsa familja e tij u rrëmbye në shtëpi.
Pas një gjyqi të gjatë, Bucpapa dhe Hysenaj u gjetën fajtorë dhe u dënuan me burgim, ku Bucpapa përfundoi me dënim të përjetshëm, ndërsa Hysenaj mori 20 vjet. Të tjerë anëtarë të bandës si Lee “Lightning” Murray dhe Paul Allen u përpoqën të ikin në Marok.
Gjashtëmbëdhjetë vjet pas grabitjes, shefi i Krimeve të Rënda në Policinë e Kentit, Superintendenti Detektiv Gavin Moss, njoftoi se ngjarja nuk është një hetim aktiv, por vazhdon të rishikohet. Ai theksoi se janë bërë hetime në mbarë botën për të identifikuar përgjegjësit dhe rikuperuar paratë e humbura, por me kalimin e kohës, shumë nga këto para janë pagjurmueshme. Megjithatë, hetimet vazhdojnë për të sekuestruar pasuri nga ata të përfshirë në këtë krim monumental.
