GJERMANI- Një skulpturë gjigante e një gruaje të zhveshur dhe të mbuluar me pak dëborë ka shkaktuar zemërim te CDU në Hamburg. A bëhet fjalë për Angela Merkel? Në çdo rast, ngjashmëria e skulpturës me kancelaren është befasuese.
Merkel e supozuar është ulur në një kontejner pranë teatrit ‘Thalia’ në Hamburg-Altona.
“Të gjithë mendojnë se është Merkel. Kush tjetër do të ishte?”, thotë një fqinj duke qeshur. Megjithatë jo të gjithë mendojnë se është për të qeshur. Jo vetëm sepse plastika ndodhet në një vend të dukshëm publik të një teatri që merr fonde komunale.
Kreu i CDU në Hamburg, Dennis Therind thotë se është diçka pa shije dhe një punim i keq. Kurse kreu i grupit parlamentar të CDU-së në Altona, Sven Hielscher ankohet: “Talljet e politikanëve zakonisht priten mirë nga qytetarët. Por kjo kontribuon në një zhgënjim të përgjithshëm me politikën dhe çon në një rënie të vlerësimit për politikën”.
Por a tregon kjo plastikë gjigante ish-kancelaren?
Fakt është se figura ishte dikur pjesë e një drame të George Buechner me titull “Vdekja e Dantonit”. Por pa kokë. Një zëdhënëse e teatrit tha se trupi i gruas iu shit më vonë pronarit të godinës ku është vendosur teatri. Ai duhet të ketë vënë kokën e Merkel mbi të.
“Ky nuk është një mesazh politik nga ana jonë”.
Por çfarë mesazhi dëshiron të shprehë pronari aktual me ‘artin e Merkel’? Nuk dihet. Ai nuk iu është përgjigjur pyetjeve të BILD. Gjithsesi një gjë është e qartë: Merkel lakuriq në dëborë nuk ka pse të largohet, sado ofenduese të jetë ajo. Një zyrtare e qarkut thotë se ‘arti është art’.
