Nga Sam Cranny-Evans, SPECTATOR
Shtetet e Bashkuara po dërgojnë një armë të re në Ukrainë në luftën kundër Rusisë: dronin Switchblade. Të paktën 100 sisteme për hedhjen e tyre po dërgohen nga SHBA si pjesë e një pakete ndihme ushtarake prej 800 milionë dollarësh. Droni Switchblade, që lëshohet nga një tub dhe është pak a shumë sa një bukë bagetë, është i pajisur me një kokë lufte shpërthyese. Një operator e fluturon dronin në një zonë interesi përpara se të zbulojë, identifikojë dhe sulmojë një objektiv me efekt vdekjeprurës. A mund ta ndihmojë kjo Ukrainën që të fitojë luftën?
I projektuar dhe i prodhuar në Kaliforni nga kompania AeroVironment, ka variante të shumta të dronit Switchblade. Fillimisht duket se ka të ngjarë që Switchblade 300, një variant më i vogël i dronit, të dërgohet në Ukrainë. Me një distancë prej 10 kilometrash dhe një kohë maksimale fluturimi prej 15 minutash, droni do t’u mundësojë forcave ukrainase të synojnë trupat ruse me saktësi nga një distancë e sigurt. Switchblade mund të lidhet me dronë të tjerë falë inteligjencës artificiale për të mbështetur zbulimin dhe identifikimin e objektivave të mundshëm. Eksplozivi i tij është afërsisht sa një granatë 40 mm. Dhe ndërsa nuk i mposht mjetet e blinduara, koka e tij është e mjaftueshme për të sulmuar këmbësorinë dhe automjetet e pambrojtura.
Vëllai i madh i Switchblade 300, Switchblade 600, do të përfshihet gjithashtu në ofertën e SHBA për Ukrainën. Me një distancë prej 90 kilometra dhe një kohë fluturimi prej 40 minutash, versioni 600 vjen i pajisur me një ngarkesë shumë më të madhe: ai ka një kokë shpërthyese të ngjashme me atë të raketave anti-tank Javelin. Kjo ngarkesë përdor atë që njihet si efekti Munroe për të shkatërruar tanket. E thënë thjesht, funksionon duke përdorur një eksploziv që është formësuar rreth një shtrese metalike të zbrazët. Astari metalik vjen në shumë forma dhe është i përbërë nga shumë metale, përfshi bakër, alumin dhe madje diçka të quajtur molibden. Kur koka godet objektivin, eksplozivi rreth metalit shpërthen. Forca ndryshon karakteristikat e metalit duke e bërë atë të veprojë si një lëng, edhe pse në fakt mbetet i ngurtë. Në këtë proces, metali fillon të zgjerohet larg nga shpërthimi në një shufër të gjatë të hollë. Maja e shufrës mund të lëvizë me një shpejtësi deri në 10 mijë metra në sekondë. Kjo krijon një sasi të madhe të energjisë kinetike që lejon shufrën të depërtojë në automjetet e blinduara, duke dëmtuar ose vrarë ekuipazhin dhe pajisjet brenda armaturës së automjetit.
Përsa i përket asaj që ndodh tani, rezultati i këtij konflikti- si çdo tjetër- mbetet i varur nga situata e përgjithshme e një force të armatosur, në krahasim me karakteristikat specifike të çdo arme (me përjashtimin e mundshëm të armëve bërthamore). Pajisje të tilla si Switchblade sigurisht që luajnë një rol, por mënyra se si forcat e armatosura të një vendi organizohen, stërviten dhe drejtohen është gjithashtu vendimtare, nëse jo më shumë.
Për më tepër është e rëndësishme të mos injorohet roli që luan ai që njihet si koncepti i operacioneve CONOPS. Një CONOPS është një deklaratë e lëshuar nga komandanti për qëllimet, ku shpjegohet qartë se çfarë do të arrijë forca dhe si do ta bëjë këtë me burimet që ka në dispozicion. Nëse komandanti nuk ka qenë në gjendje të vlerësojë siç duhet një situatë, është e mundur që CONOPS të mos jetë i përshtatshëm për të përballuar rezistencën- dhe forcat në fjalë duhet të punojnë shumë për të qenë të suksesshëm ose mund të dështojnë krejtësisht. Në Ukrainë, kjo duket se është ajo që ka ndodhur me Rusinë.
Ekziston gjithashtu një komponent moral në çdo operacion ushtarak: vullneti i forcës për të kryer misionin e saj dhe vullneti i kundërshtarit për të rezistuar. Nëse njëra anë është më e dobët, mund të ndikojë në gjithçka tjetër.
Çfarë lidhje ka kjo me dronët Switchblade? E thënë thjesht, këta dronë janë mjete që do i shtohen pamjes më të gjerë të fushëbetjes së Ukrainës. Duke supozuar se ato mund të integrohen pa ndikuar negativisht në ndonjë nga faktorët e tjerë në lojë, Switchblade 300- dhe vëllai i tij më i madh e më vdekjeprurës- do të ofrojnë alternativa shtesë për të sulmuar me saktësi automjetet dhe personelin e pambrojtur.
Megjithatë, realiteti është se Ukraina ka tashmë opsione të shumta për ta bërë këtë. Dronët Switchblades mund të jenë të dobishme për ekipet e vogla dhe të shpërndara që po përpiqen të veprojnë prapa vijës së avancimit të Rusisë. Por në fund të fundit, ato nuk kanë gjasa që të vendosin për fatin e luftës.
Rezultati i luftës do të mbështetet në shumë ngjarje dhe ndërveprime të vogla që vijnë së bashku gjatë rrjedhës së luftës. Një armë e vetme nuk do e ndryshojë ekuilibrin. Dërgimi i armëve moderne si Switchblade tërheq shumë interes, por realiteti është se përpjekjet ndërkombëtare për të stërvitur forcat e armatosura të Ukrainës në vitet para pushtimit kanë pasur një ndikim shumë më të madh se shumë prej dërgesave të armëve, duke përfshirë edhe këtë shfaqje të fundit të mbështetjes nga SHBA.
