Një telefonatë më shumë se dy orë mes presidentit rus Vladimir Putin dhe presidentit amerikan Donald Trump ka sjellë shqetësime mbi qëllimet e Moskës dhe ndikimin që kjo mund të ketë në politikën e jashtme të Uashingtonit. Kjo ishte biseda e tetë në tetë muaj mes dy liderëve dhe erdhi në një moment delikat, pak para takimit të Trump me presidentin ukrainas Volodymyr Zelensky dhe në një kohë kur debati mbi dërgimin e raketave amerikane Tomahawk në Ukrainë ishte në kulmin e tij.
Sipas Kremlinit, telefonata ishte “pozitive dhe produktive”, por në thelb synonte të frenuar mbështetjen ushtarake amerikane për Ukrainën, e cila mund të ketë ndikim në gjendjen e luftës. Putin minimizoi efektin e raketave Tomahawk, duke theksuar se një vendim për t’i dërguar ato Ukrainës do dëmtonte marrëdhëniet mes SHBA-së dhe Rusisë, një mesazh që kishte si target Trumpin, që vlerëson marrëdhënien personale me liderin rus.
Një ndihmës i Kremlinit e përshëndeti Trumpin si një “paqebërës” dhe lavdëroi rolin e tij në armëpushimin në Gaza, një retorikë që mund të shërbejë për të tërhequr Trumpin drejt një samiti të ri në Budapest, i cili do të diskutojë luftën në Ukrainë. Megjithatë, CNN konstaton se nuk ka asnjë indikacion për ndryshim në qëndrimin rus; Moska vazhdon të synojë zgjerimin e territorit dhe kërkesa të rrepta për pasluftë, të cilat Ukraina i refuzon.
Kremlini duket se nuk është i interesuar për kompromis, por për një fitore politike për Trumpin, që ai mund ta paraqesë si sukses personal. Burimet në Uashington sugjerojnë se presioni mbi Trump për të mos dërguar raketat Tomahawk e detyroi Putinin të rifillojë dialogun, me shpresën se një “marrëveshje e madhe” mund ta tërheqë Trumpin, i cili kërkon një arritje ndërkombëtare për mandatin e tij të dytë.
Kjo bisedë, përveç tensioneve, nënkupton një dinamikë të re në marrëdhëniet SHBA-Rusi, në një klimë gjeopolitike të trazuar.
