Avokati Genc Gjokutaj ka analizuar vendimin e GJKKO për ish-Zv/Kryeministren Belinda Balluku, duke theksuar se masat e marra janë tërësisht në përputhje me Kodin e Procedurës Penale.
Sipas tij, pezullimi nga ushtrimi i detyrës publike, i parashikuar në nenin 242, është një masë ndaluese e ligjshme, ndërsa ndalimi i daljes jashtë shtetit sipas nenit 233 përbën masë shtrënguese.
Gjokutaj shpjegon se këto masa nuk cenojnë lirinë e Ballukut si deputete, pasi nuk prekin cilësinë e personit të zgjedhur. Ai nënvizon se SPAK nuk ka kërkuar ndonjë procedurë në Kuvend, çka do të ishte e domosdoshme në rast se masat do të prekeshin nga statusi parlamentar.
Sipas avokatit, procedura e ndjekur nuk bie ndesh me ligjin procedural penal dhe as me Kushtetutën. Ligji shkon deri tek pezullimi nga detyra, ndërsa shkarkimi i Zv/Kryeministres është kompetencë e Kryeministrit, i cili duhet të emërojë një tjetër në vend të saj.
Postimi:
Të nderuar Miq!
Një nga masat ndaluese të marra sot nga GjKKO është sipas dispozitës së nenit 242 të Kodit të Procedurës Penale që bën fjalë për “Pezullimin nga ushtrimi i një detyre a shërbimi publik”!
Marrja e kësaj mase ndaluese ndodhi në kushtet kur Zv/Kryeministërja Belinda Balluku nuk dha dorëheqjen por as Kryeministri Rama nuk e shkarkoi!
Në Kodin e Procedurës Penale të Republikës së Shqipërisë parashikohen:
- Masa shtrënguese siç mund të jetë “arresti në burg” apo “Ndalimi i daljes jashtë shtetit” etj
- Masa ndaluese siç është “Pezullimi nga ushtrimi i një detyre a sherbimi publik”!
Nga ana e GjKKO me kërkesë të SPAK ndaj ish-Zv/Kryeministres Belinda Balluku janë caktuar një masë ndaluese siç është “Pezullimi nga ushtrimi i një detyre a shërbimi publik” dhe një masë shtrënguese siç është “Ndalimi i daljes jashtë shtetit” sipas nenit 233 të Kodit të Procedurës Penale!
Rasti konkret si më sipër ka 2 elementë thelbësorë që nuk pengojnë marrjen e tyre:
Së pari nuk cënojnë lirinë e shtetases Belinda Balluku në detyrën e Zv/Kryeministres.
Së dyti këto masa ndalojnë daljen jashtë shtetit dhe pezullojnë Zv/Kryeministren nga detyra për shkak te një krimi të pretenduar të kryer prej saj por të dyja apo edhe veç e veç nuk cënojnë dhe afektojnë cilësinë e personit të zgjedhur (deputete) çka do të përbënte pengesë ligjore në marrjen dhe ekzekutimit të masave shtrenguese!
Madje as nga SPAK nuk është inicuar ndonjë procedurë e tillë në Kuvendin e Shqipërisë!
Si më sipër procedura e ndjekur deri tani nuk bie ndesh me lighin Procedural Penal dhe për rrjedhojë as me Kushtetutën e Republikës së Shqipërisë!
Ajo që duhet theksuar në këtë rast është fakti se Ligji shkon deri tek pezullimi nga detyra!
Pra i takon Kryeministrit të bëjë shkarkimin nga detyra të Zv/Kryeministres dhe emërimin e një tjetri/tjetre në vend të saj ndaj ligjërisht dhe procedurialisht nuk kemi as bllokim dhe jo më “grusht shteti” siç alarmohen disa!
E ndërsa teorikisht rasti është i qartë praktikisht prognoza është e turbullt pasi Zv/Kryeministërja e emëruar në një ceremoni prej 30 minutash ka orë të tëra në Kryeministri dhe nuk pranon largimin nga detyra!
Por një gjë është e sigurtë!
Siç ndodh në “vrasjet në çift” KM do ta ekzekutojë Zevendësen e tij dhe më pas do të “vrasë” edhe veten për të mos parë llahtar me sy!
