Altin Dumani ka folur sot në “Qendra për studimin e demokracisë” e organizuar në kuadër të Tryezës së Drejtësisë. Kreu i SPAK, ndër të tjera përmendi punën e bërë nga institucioni i tij gjatë këtij 5-vjeçari, qysh prej periudhës në të cilën u krijua.
Shefi i Prokurorisë së Posaçme theksoi edhe një herë se nuk ka më të paprekshëm, si dhe i mëshoi faktit të konsolidimit të institucionit që drejton. Edhe pse kryeministri Edi Rama provokoi ditën e djeshme duke thënë se mund ta shkrijë kur të dojë SPAK, Dumani u duk se iu përgjigj duke thënë se qytetarët kanë fituar besimin e tyre.
Në fund e mbylli duke garantuar se SPPAK do të respektojë ligjin në çdo kohë dhe për çdo subjekt që do të vihet para drejtësisë. Në fjalën e tij në këtë tryezë, Dumani u shpreh:
“Epoka e paprekshmërisë po lëkundet. Po ashtu rritja e kapaciteteve të SPAK ka vendosur themele të shëndosha. Besimi i partnerëve ndaj SPAK është rritur, kryesisht nga SHBA, Britania e Madhe, Zvicra dhe vendet e Amerikës Latine. Dua t’I falënderoj të gjithë për besimin që kanë pasur ndaj nesh. Gjithashtu marrëdhënien me INTERPOL, EUROPOL dh EUROJUST është forcuar.
Goditja ndaj fuqisë ekonomike të kriminelëve ka bërë progress. Në 2024 janë konfiskuar 59 milionë euro, këtu përfshihen edhe kriptovalutat që po gjejnë më shumë terren në botën kriminale. Lufta ndaj pastrimit të parave, synon të japë mesazhe të qarta që krimi nuk mund të blejë. Tashmë jemi në fazën e konsolidimit të institucionit.
Kjo periudhë 5-vjeçare ka shërbyer për t’u konsoliduar. Besimi në drejtësi po rritet. Sërish ka sfida, por SPAK do të vazhdojë të kryejë detyrën me integritet bazuar në Kushtetutë dhe ligj. Duhet të keni besim te prokurorët tanë, ne garantojmë se asnjë forcë e jashtme s’do të na ndikojë”.
