Drejtori i përgjithshëm i RTSH, nuk ndalet me skandalet që shkakton në drejtimin e institucionit më të madh publik informues në vend. Në shkelje të plotë të kritereve ai dhe Anila Agalliu kanë zhvilluar konkurs fiktiv për të emëruar në postin e kryeredaktorit të kanalit të parë Kejsi Lama.
Drejtoresha e burimeve njerëzore Anila Agalliu, ka skualifikuar Klajdi Goricën, një gazetar me përvojë 2 dekada në televizion dhe ka zgjedhur si shefe të kanalit të parë në televizion publik Kejsi Lama, për meritën e vetme se është shoqja e Bora Xhanijes. Bora Xhania vetë është 26 vjecarja e katapultuar nga Alfred Peza si Drejtuese e Njësisë së Programeve në RTSH, edhe ajo vetë pa plotësuar asnjë kriter. Ah po, plotëson kriterin se ka punuar në Alpenews (portali privat i Alfred Pezës).
Këshilli Drejtues ftohet publikisht të bëjë verifikimet e procedurave të marrjes në punë të:
Drejtueses së Programeve – Bora Xhanija
Kryeredaktores së Kanalit RTSH 1- Kejsi Lama
Drejtueses së njësisë së Lajmeve – Blerta Gjermani
Drejtores së Arkivit – Endra Ceco
Drejtorit Juridik – Enkelejd Lamaj
Përgjegjëses së Sektorit të Prokurimeve
Përgjegjësit të Profilaktikës
E shumë të tjerë që nuk plotësojnë vitet e vjetërsisë në profesion, e jo më të kenë integritet profesional për pozicionet që mbajnë. Të tëra këto në kundërshtim me rregulloret, kriteret e miratuar nga Këshilli Drejtues dhe statutin e RTSH.
Mediokriteti i çetës së Alfred Pezës shkon deri aty sa për ti rritur madhështinë Bora Xhanijes urdhëron stafin e Njësisë së Programeve të firmosin në orën 08:00 dhe në 16:00 tek zyra e Borës, a thua se nuk mjafton sistemi elektronik i RTSH për dokumentimin e prezencës në punë. Por digjitalizimi i Pezës merr kuptim me bërjen faktor të stafit tek Bora Xhanija, sepse përndryshe ajo nuk ka si e demonstron ofiqin e drejtorllëkut të dhuruar nga kapteri në kundërshtim me ligjin.
Këshilli Drejtues po kontrollon dosjen e Bora Xhanijes. Por Këshilli nuk duhet të harrojë të kërkojë planin e strukturës programore që ka për detyrë Drejtuesi i Njësisë së Programeve, për të kuptuar akoma më mirë tragjikomedinë ku e ka zhytur RTSH-në Alfred Peza
Për të gjitha këto skandale duhet të reagojë menjëherë Këshilli Drejtues dhe ti denoncojë në KLSH, meqë kjo e fundit është në RTSH prej 1 muaji. Veprimet e Alfred Pezës duhet të auditohen menjëherë nga Kontrolli i Lartë i Shtetit për shkeljet në largimet e punës dhe rekrutimin e stafit të ri duke i sjellë institucionit miliona lekë dëme.
Ndërkohë që taksapaguesit shqiptarë presin nga RTSH të prodhojë programe, vetë Drejtori i prodhimit Vladimir Grori nuk ndahet dot nga zakoni i kameramanit dasmaxhi, ku nuk humbet rast të shkojë të regjistrojë dasma(tashmë me pasjijet e RTSH).
Alfred Peza në shpalosjen e Platformës së tij fituese kishte rritjen e prodhimit të programeve, dhe në fakt ka rritur numrin e dasmave të xhiruara nga Vladimir Grori i cili me postin që ka marrë ka ngritur edhe pazarin e dasmave sepse tani shkon bën dasmë si Drejtor Prodhimi i Televizionit Publik Shqiptar.
Lad Grori me kamera në duke filmuar në dasëm!
Në fakt ai është një analfabet që jo vetëm nuk harton dot as shkresat e përditshme, (kjo faktohet lehtësisht nëse shihen shkresat përcjellëse të Drejtorisë së tij), por edhe thërret vartësit ti konceptojnë shkresat. Ai vetë di të mbajë bllokun e kuq dhe këmishën sipas porosisë së kapterit. Ndërkohë për sasinë e prodhimit të programeve në RTSH nuk flet askush, mjafton që stafi i RTSH hyn në punë në orën 8 dhe të dalë në 16, si të ishte fasoneri prodhimi këpucësh dhe jo qendër krijimtarie artistike, qendër informimi dhe mjet edukimi.
Këshilli Drejtues dhe Kontrolli i Lartë i Shtetit, të auditojë pse Alfred Peza po prish studiot? Me çfarë plani po i prish. Me çfarë të ardhurash po i prish dhe do i ndërtojë ato, kur në planifikimin e buxheteve nuk ka asnjë zë për këto punë? Situata e kaosit në RTSH është prezente kudo, ku askush nuk di ti kërkojë kujt asgjë.
Kapteri duhet të japë llogari përpara Këshillit Drejtues për çdo shpërdorim detyre, shkelje ligjore dhe abuzim me pushtetin që ka bërë. Dita po afron….Këshilli Drejtues duhet të marrë situatë në dorë dhe të vendosë RTSH-në në shinat e funksionimit dhe prodhimit që taksapaguesit presin.
