Organizata Botërore e Shëndetësisë (OBSH) ka shpallur një alarm të ri për përhapjen e hipertensionit të pakontrolluar në botë, duke theksuar se rreth 1.4 miliard njerëz janë prekur, ndërsa vetëm 1 në 5 e ka këtë gjendje nën kontroll. Sipas raportit të dytë global mbi hipertensionin, boshllëqet në parandalim, diagnostikim dhe trajtim janë më të theksuara në vendet me të ardhura të ulta dhe të mesme.
Një nga shkaktarët kryesorë të hipertensionit është mungesa e aksesit në ilaçet e rekomanduara nga OBSH-ja. Vetëm 28% e vendeve me të ardhura të ulta raportojnë disponueshmërinë e këtyre barnave në kujdesin parësor, krahasuar me 93% të vendeve me të ardhura të larta. Hipertensioni kontribuon ndjeshëm në sëmundjet kardiovaskulare, duke përfshirë atakun në zemër dhe goditjet në tru, dhe OBSH paralajmëron se mosveprimi urgjent mund të shkaktojë miliona vdekje të parakohshme dhe kosto ekonomike prej rreth 3.7 trilionë dollarësh për vitin 2023 për vendet me të ardhura të ulta dhe të mesme.
Drejtori i OBSH-së, Tedros Adhanom Ghebreyesus, theksoi se vendet kanë mundësitë për të përmirësuar situatën nëse investojnë në shërbime shëndetësore cilësore dhe integrojnë trajtimin e hipertensionit në kujdesin parësor. Ai shpjegoi se çdo orë humbasin mbi 1,000 jetë nga sëmundje që mund të parandalohen.
Megjithatë, raporti tregon se disa vende po arrijnë përparime përmes politikave shëndetësore të forta dhe rritjes së ndërgjegjësimit. Sidoqoftë, sfidat mbeten të mëdha, si mungesa e pajisjeve të matjes së presionit të gjakut dhe çmimi i lartë i ilaçeve.
OBSH apelon për reforma të shpejta, mbështetje financiare dhe angazhim politik për të parandaluar përhapjen e hipertensionit dhe për t’iu përgjigjur këtij problemi të madh shëndetësor dhe ekonomik global.
