Në trevën ku Shqipëria, Greqia dhe Maqedonia e Veriut i japin fund kufijve të tyre, Liqeni i Prespës është në qendër të një iniciative mbrojtëse nga tri organizata joqeveritare. Ky liqen, që daton rreth pesë milionë vjet më parë, është shtëpia e dy zonave ujore, Liqenit të Prespës së Madhe dhe Liqenit të Prespës së Vogël, me një bukuri natyrore të paprekur dhe panoramë mahnitëse.
Një nga simbolizmat e faunës së liqenit është Pelikani Dalmat, një specie e rralle që veçohet për sqepin e tij karakteristik rozë e portokalli, si dhe pendët e bardha. Aktualisht, rreth 1,500 çifte të kësaj specie jetojnë këtu, duke formuar koloninë më të madhe të Pelikanëve Dalmatë në botë.
Megjithatë, zona përballet me sfida të shumta. Ambientalistët identifikojnë ndryshimet klimatike dhe aktivitetet njerëzore, si bujqësia, si faktorë që po ndikojnë negativisht në nivelin e ujit. Në një reportazh të DW, theksohet se banorët në zonat përreth dëshirojnë të zhvillojnë ekonomitë e tyre lokale përmes turizmit. Ata besojnë se eko-turizmi në Prespë mund të jetë një mundësi fitimprurëse për investitorët, duke insistuar se zhvillimi i turizmit nuk duhet të dëmtojë natyrën.
Në këtë kuadër, organizatat joqeveritare po punojnë për të siguruar një balancë mes turizmit dhe mbrojtjes së mjedisit. Synimi i tyre është që këto dy aspekte të funksionojnë pa u ndërprerë, duke garantuar kështu një zhvillim të qëndrueshëm.
Të treja vendet punojnë së bashku për të trajtuar këto çështje dhe për të ruajtur jo vetëm pasuritë natyrore, por edhe për të avancuar pasuritë ekonomike të rajonit. Iniciativat e përbashkëta tregojnë angazhimin për të mbajtur Prespën si një destinacion atraktiv dhe të mbrojtur për brezat e ardhshëm.
