Josep Martinez, portieri i Interit, është nën hetim për krim rrugor pa dashje, pas një aksidenti tragjik mëngjesin e martës, ku humbi jetën 81-vjeçari Paolo Saibene. Ngjarja ndodhi gjatë kohës kur Martinez po udhëtonte në drejtim të Appiano-s për stërvitje.
Sipas informacioneve të para, viktima duket se ka shfaqur shenja destabilizimi përpara aksidentit, duke kaluar në korsinë e automjeteve. Autoritetet morën të dhënat për të rindërtuar dinamikën e aksidentit dhe për të përcaktuar përgjegjësitë.
Martinez, 27 vjeç, ishte duke drejtuar një automjet të markës BYD, një SUV hibrid, i cili është sekuestruar së bashku me automjetin tjetër në vendngjarje. Rruga u bllokua për hetime, ndërsa procedurat vijojnë në zhvillim. Sipas legjislacionit, dhe nëse dënohet për vrasje në aksident, portieri mund të përballet me një dënim nga 2 deri në 7 vjet burg, si dhe pezullim të patentës. Nëse faji rezulton të jetë më i lehtë, mund të ketë një dënim nga 6 muaj deri në 5 vjet, së bashku me një gjobë.
Rreth rrethanave të ngjarjes, dëshmitë sugjerojnë se aksidenti mund të ketë qenë i papritur, duke u ndikuar nga sjellja e paparashikueshme e viktimës. Nëse kjo konfirmohet, rasti mund të mbyllet pa pasoja penale, përveç një dëmshpërblimi që do të mbulohej nga kompanitë e sigurimit. Ligji parashikon se në situata kur sjellja e këmbësorit është jashtë normales, drejtuesi i mjetit nuk është i përgjegjshëm.
Hetimet vazhdojnë intensivisht për të sqaruar të gjitha aspekte e ngjarjes tragjike që tronditi komunitetin.
