Shtetasi F. C., 58 vjeç, nga fshati Viçisht, u arrestua në flagrancë nga Sektori i Policisë Rrugore për dy akuza: “Drejtimi i automjeteve në mënyrë të parregullt” dhe “Fshehja e të ardhurave”. Arrestimi ndodhi pas një incidenti të ndodhur dje në aksin rrugor të fshatit Çerenec, ku F. C. duke drejtuar një furgon, në gjendje të dehur, humbi kontrollin dhe doli nga rruga. Si pasojë, pesë pasagjerë u lënduan, dy prej të cilëve ndodhen në spital, por jashtë rrezikut për jetën.
Hetimet zbuluan se ai kishte kryer aktivitetin e transportit të udhëtarëve pa pasur licencën përkatëse. Një tjetër rast në këtë kuadër përfshin një 16-vjeçar, i cili u ndalua duke drejtuar një motomjet pa leje drejtimi; materiali i tij kaloi në Prokurori për procedim penal.
Më tej, specialistët e Hetimit të Krimeve në Komisariatin e Policisë Dibër referuan materialet në Prokurori për shtetasin G.R., 39 vjeç, banues në Peshkopi. Ky i fundit u akuzua për ndotje ambienti teksa prodhonte asfalt në fabrikën e tij, duke çliruar sasi të mëdha tymi.
Të gjitha materialet procedurale janë kaluar në Prokurorinë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
