MILOT- Një aksident rrugor ka ndodhur mbrëmjen e sotme në aksin Milot-Thumanë, ku një automjet ka humbur kontrollin dhe si pasojë ka përfunduar në kanal.
Raportohet se një nga katër të plagosurit ka ndërruar jetë, rrugës për ne spitalin e Traumës në kryeqytet. Ndërkohë tre plagosurit e tjerë janë dërguar në spitalin e Traumës. Sipas raportimeve të aksidentuarit janë anëtarë të së njëjtës familje.
NJOFTIMI I POLICISË:
Rreth orës 21:30, në aksin rrugor “Tiranë–Lezhë”, në vendin e quajtur Fushë-Gjormë, një automjet tip “Volkswagen”, me drejtues shtetasin B. Q., 29 vjeç, ka humbur kontrollin dhe ka dalë nga rruga.
Si pasojë janë dëmtuar drejtuesi i automjetit dhe tre pasagjerët: shtetasit I. Q., rreth 70 vjeç, L. Q., rreth 40 vjeç, dhe M. Ç., rreth 60 vjeçe.
Të dëmtuarit janë transportuar në Spitalin e Traumës, në Tiranë, për ndihmë mjekësore më të specializuar.
Grupi hetimor ndodhet në vendngjarje dhe, nën drejtimin e Prokurorisë, po punon për sqarimin e plotë të rrethanave dhe përcaktimin e shkakut të aksidentit.
