Një aksident rrugor është shënuar në superstradën Lezhë-Shkodër, pranë kryqëzimit të Gjadrit, sonte pasdite. Ngjarja ka përfshirë tre automjete, të cilat janë përplasur mes tyre, duke shkaktuar plagosjen e pesë personave. Të gjithë të plagosurit janë transportuar me urgjencë në spitalin e Lezhës për të marrë ndihmën e nevojshme mjekësore.
Sipas autoriteteve, aksidenti ndodhi rreth orës 18:20, kur automjetet e drejtuara nga shtetasit I. B., P. N. dhe shtetësja e huaj N. R. u përplasën. Mes të plagosurve janë tre drejtuesit e automjeteve si dhe dy pasagjerë nga automjeti i I. B., përfshirë bashkëshorten dhe vajzën e tij të mitur, e cila është 6 vjeçare. Të gjithë ndodhen jashtë rrezikut për jetën, sipas njoftimit të policisë.
Pas ngjarjes, shërbimet e policisë rrugore arritën në vendngjarje për të hedhur dritë mbi shkaqet dhe rrethanat e aksidentit. Qarkullimi në këtë segment rrugor ka pësuar vështirësira përkohësisht, duke krijuar pengesa për automjetet që kalojnë. Hetimet për këtë aksident po vazhdojnë, për të sqaruar detajet e ngjarjes.
