Një aksident i rëndë rrugor ka ndodhur këtë mbrëmje në aksin Qaf Murriz-Shakalla e Tujanit, në zonën e quajtur Zall-Bastar. Dy automjete janë përplasur, si pasojë e së cilës kanë rezultuar të plagosur katër persona. Pamjet e siguruara nga korrespondenti i Top Channel, Dëfrim Karaj, tregojnë se një nga automjetet është kthyer përmbys pas përplasjes.
Drejtuesit e mjeteve përkatëse kanë njoftuar menjëherë policinë dhe ambulancën, të cilat kanë ardhur në vendngjarje dhe kanë dërguar të gjithë të plagosurit në spitalin e Traumës për ndihmë mjekësore.
Aktualisht, policia dhe grupi hetimor kanë nisur një hetim për të zbardhur shkaqet e aksidentit. Sipas informacioneve paraprake, thuhet se lagështira në rrugë dhe shpejtësia e lartë e automjeteve mund të kenë kontribuar në këtë ngjarje fatkeqe.
